太耐無寫過嘢了,所以係開始寫之前,望住部電腦呆咗有十分鐘時間....――``` 話咁快又一年了,近排經歷咗好多嘢,突然覺得自己重好幼稚... 話說我哋部門四月份大地震,呢樣嘢係預咗咖啦,個個人都有心理準備,但係無諗到結果係咁出乎我哋意料之外,諗住大地震應該係全部大調換咖,點知到最後居然只係我哋班調,重點係調走咗我哋最敬愛嘅歐歐!全台至平易近人嘅班長…無天理吖!! 歐歐係我到依家重留喺度做嘅動力嚟咖,如果唔係佢鼓勵我,我諗我唔會挨得過舊年年底咯,不過點都好啦,天下無不散之筵席,終有一日我都會離開呢度,但係我永遠會記得呢個咁好嘅上司,佢真係當我哋呢班新人係自己嘅仔女咁咖,雖然佢唔係我師傅,但自問佢比我師傅教得我重多,無論係工作上嘅或者係待人處世,真係好鬼唔捨得佢咖!(呢句說話畀歐太聽到唔知會點諗呢..哈哈,放心我對歐歐只有敬重!唔好誤會!)短短嘅一段话,代表咗我三月份嘅心情,希望我会有勇气继续挨落去啦...
|
3月1日,心血來潮地同媽咪跟團去咗番禺嘅百萬葵園一日遊!呵呵…呢度我其實讀大學嗰陣就已經想去啦,但無錢嘛,因為門票都幾貴下…今次跟團去,唔包飯,69龜一個人,都算係幾抵,如果自己去嘅話,淨門票都要60啦!
朝早七點半,我哋去到天河城嘅集中點,等到8點上車,居然重有人遲到,同車好多都係上咗年紀嘅老人家,所以咯喔,遲到嗰位一路上就畀人係咁哦係咁哦…十點半鐘左右,我哋就到啦,可能唔係節假日,所以園區裏面有啲冷清,不過咁樣重好,唔使影相嘅時候一大班親戚!百萬葵園裏面真係有好鬼多花咖,乜都有~``我媽咪重話啲花唔夠多添,一路行一路就話:乜鬼百萬葵園吖,都無一百萬樖葵花!你話係咪笑大人個口吖!話百萬葵園就一定要有一百萬樖葵花咩~``我自己覺得就都算多咖啦,你話呢?
呢度有好大嘅薰衣草園,啲薰衣草真係好香,香到令人覺得有啲悶…薰衣草嘅花語係等待愛情…哈哈!同我一樣喔,我都係等待緊我嘅偉大愛情!
本來有個玫瑰園咖,可惜我嚟得唔係時候,呢個時間無乜幾多玫瑰,但係都畀我抓拍到兩張,掂唔掂呢…
跟住就係我哋此行嘅戲肉啦!櫻花……………
哇咔咔咔…真係不愧係櫻花,靚到爆燈啦!連我叫Cherry嘅,都引以自豪吖!
但係可能因為係嫁接嘅關係,啲櫻花樹好矮,無辦法體會到落櫻繽紛係頭頂飄過嘅感覺!不過可以係廣州,咁近距離地接近櫻花,都算係還咗我自己嘅一個心願啦!
我哋重係餐廳度品嘗咗呢度嘅特產—葵花雞,同埋薰衣草雪糕!
喺下午,我哋就去咗大夫山,齋行!(我大一嗰陣就已經去過啦,但係呢個景點唔使錢嘅,咪當散步咯…)
四點半,返到廣州!結束一日嘅行程!
|
|
捨不得 (結他版)
曲/詞 : 小東
我是真的捨不得 捨不得讓你遠走
捨不得讓你的一切變成了泡沫
黑夜都逃離了燈火
眼淚一顆一顆不停流 流到嘴邊化爲了虛空
空中還有一點點溫柔 是你的放縱
思念一片一片地拼湊 湊成你最驕傲的輪廓
我們到底犯了什麽錯 愛情讓人落魄
#我是真的捨不得 捨不得讓你遠走
捨不得讓你的一切變成了泡沫
黑夜都逃離了燈火
我是真的捨不得 捨不得讓你難過
捨不得讓你的溫度在手心陷落
分手是真的不快樂 #
每次夜色降臨都感到冷清 逃進空洞人群
那一種快樂才讓人放心 被動地隨你悲喜
#重唱
 如果大傢想暸解多啲關于呢首歌嘅話,歡迎click入以下呢個網阯...
http://www.n-visio.com/sammul/index.htm
|
|
今日,  我幫我嘅士多啤梨仔仔執正咗佢嗰靚樣,以后我會不定時地記錄低佢嘅成長過程,希望佢早日開花結果啦! 
P.S. 睇唔睇到呢,隔離重有盆薰衣草咖!今日先種咖,唔知幾時先髮芽.... 
我都係尋晚先記得起我部手機嘅相機有微距拍攝嘅功能,得唔得呢~``
|
|
前日係普天同慶嘅情人節~``又係一個孤獨嘅情人節!早上返咗公司加班,反正又無人約,自己亦都唔想約人,咪返工賺返啲加班費咯!夜晚同媽咪去咗買花過年,你睇我啲眼光掂唔掂呢?花開富貴吖嘛,梗係牡丹靚啦,樖蟹爪菊都唔輸折,開得好燦爛…今晚上夜班,因為媽咪無準備宵夜,所以我惟有自己去七仔“篤”魚蛋,順便又買咗個腸仔包食,喺我食得津津有味嘅時候,有個女仔行咗入嚟,直奔向放dum-dum嗰度,我嚇咗一跳!唔係掛,半夜三更一個人入七仔買dum-dum?佢畀完錢好快咁走咗,我就繼續食我嘅魚蛋…但係我個心就係度諗,做女仔使唔使咁cheap呢?連dum-dum都要自己買埋?當時我見佢重攞住一個大袋,好似要去旅行咁款,莫非係離家出走?哈哈~``認真佩服自己嘅想像力!我走嗰陣,喺門口見到佢,重好似講緊電話咁,可能係等緊男朋友嚟接掛…其實之前曾經聽同事講過,佢女朋友係好乖嗰種女仔,但係同佢拍咗拖之後,就畀咗第一次佢,重要又係自己買dum-dum咖,依家啲女仔真係認真開放,畀我就真係做唔出,唔係我保守,而係我覺得呢樣嘢係男人嘅責任,唔應該由女人嚟做~!
|
Strawberries Yogurt
我終於都實現咗記錄底自己整嘅士多啤梨優酪乳嘅過程啦!呵呵~``今晚放工返屋企又有驚喜,媽咪買咗最新鮮嘅Strawberries,成間屋都充滿曬個陣甜甜嘅香味,可惜香味無辦法記錄,呢樣係遺憾…本來今晚我胃口唔係幾好,食飯都食得唔開胃,因為口裏面生咗[菲茲],食乜都無味啦!但係咁新鮮嘅Strawberries,如果放得太耐嘅話就會爛,浪費糧食可恥吖!於是我開始搞科研~`首先幫Strawberries洗白白先,跟住就用淡鹽水浸下佢哋(驚有蟲蟲),再放兩杯優酪乳+6只Strawberries用攪拌機打勻,就成為一杯據說係消脂佳品嘅Strawberries Yogurt啦!
|
|
|
|
|
哈哈~`我種嘅薰衣草終于出咗苗啦!好鬼si開心嘅嗟...
